Donk, so matin lindi, promié tour minisipal rézilta fini tonbé, kart po zoué fine bat a tèr, ti pé ésay analyz in pé… Plis di (10) mèr an plas lé ré-éli.
Di a moin sak zot i vé, mé kan in kandida na lapareyi minisipal dan sa min, li na vréman in gran lavantaz, dan in sosiété konm la not ou sak na bon pé maléré, zot i préfèr ankor gard zot bondié larzan ti kontra, sé konm si lé zot, sak i ariv dann zéléksyon zordi, zot i vann riink lo rèv.

Domaz po bann nouvo, sak navé in vré prozé, dé valèr démokratik, sak té i vé moralizé in pé la vi piblik, ékart la koripsyon…
Nana d kandida la pa ézité mèt bokou moyin finansié ; bann biyé 20 éro, la doné, la doné dépi plizir moi, la péyé po di aminn do moun dan zot rényon.
Koutime éléktoral i kontinié dan la tèt domoun !
Ogard moin minm, konbiin d persone, an rantran dan mon loto po alé in rényon lo soir, konbiin la domann a moin toutsuit : « mésié Justin, i donn in kou po boir dan lo rényon nou sava ? »

Konbiin apré la rényon : « oté Justin toué la poin 10 éro po moin asèt in paké sigarèt ? »
In not, lot soir, o débi li di a toué : « hin, toué la vi koman moin la ténir la bas kan la pli la komans vidé ? » ; mé toutsuit : « moin lé invité a soir sé inn kopine, ti ginye pa péy po moin dé zi èk in pil plat ? »
Sa in labitid i sort loin : i di « moeurs éléctorales » an fransé ! Koman nou va ansort anou ?
Si lo sitoyiin lé koronpi, lonm piblik osi, ou sa nout sosiété réyonèz i sava konm sa ?
Na ziska inn kamarad kandidat i avou a moin : « oté, 165 kan aprè labolysyon lésklavaz, la presyon larzan, la « terreur » lé ankor la, po bayone lékspresyon nout bann konpatriot ! ».
Ti moyin, gran kèr, alon kontinié kroir ankor, sé in idéal.

Justin