Mi souvien nana bien lontan, Parti kominis, té i roganiz shak vakans Zanvyé-Févriyé, la Plène dé kaf, sak li téi apèl la zourné bann z’intéléktyèl rényoné. Shak ané l’avé in bonpé d’moun désèrtin té militan, d’ot té pa militan mé l’avé la sinpati pou nout parti. Mi rapèl l’avé bann késtyon inportan, pou nou, konm in foi lo kréol dann l’édikasyon, konm ankor la solidarité rant bann z’il l’oséan indien. In foi nou la diskite dsi l’idantité rényonèz… Konm di lo kont in bann sizé la pa pran zordi in sèl ride mèm avèk lo tan.

Donk in zour nou té apré diskite dsi la késtyonn nasyon é nou lété apré rode in définisyon. Pou kosa ? Pars késtyon-la lé pa tro loinn sète l’idantité. Inn téi di : « nasyon avèk téritoir i marsh pa ansanm forséman ». Nana in bann nasyon na poin in téritoir pou zot é dé foi in téritoir nana plizyèr nasyon dsi. Nana bann nasyon lé koupé rant plizyèr téritoir konm bann Kurd divizé rant troi péi o moins. Ni pé di, nana in nasyon Chagos mé malorozman zot na poin lo droi, ziska zordi, artourn shé zot.

Pou in dalon dizon in frèr pou an avoir in nasyon i fo nana in pèp, é ké so pèp-la nana in mèm Istoir, in vi ékonomik ansanm-ansanm, in lang toulmoun i konpran, toulmoun i koz épi sak lé in portan galman sé lo santiman shakinn i apartien so nasyon-la. Biensir la débate, la diskité, la dispité-sa sé la vi !- mél’afèr la avans in pé kant mèm sirtou ké dann tan tout nout bann lété réini konm sink doi dann in min kont lo kolonyalism é tout lo déga li té i fé dann tan-la.

Mi rapèl in zour Prézidan Mitterrand la vni Sin-Bénoi é li la di, li oi La Rényon konm in nasyon apré formé. Zordi ni pé dir défoi li form, défoi li déform. Défoi lo l’alyénasyon i fébli, parfoi li ranfors. Si zot i vé zordi mi lans in kriyé pou mète anlèr nout l’idantité, dan la lite biensir é mi pans in gayar shanson lo ségatyé Willy la fé dann l’ané 2011. Dann séga-la i di : « Tienbo, tienbo rényoné ! tienbo, tienbo pa largué ! I fo tienbo nout rényonèzté ». A ékouté san modérasyon !