Lakey lo sit > Chroniques > Oté
Tiloun la désote la vi lo sink zilyèt 2020
Kan in gran nout maloya i tir son révérans é i sava l’ot koté la vi :
lindi 6 zwiyé 2020, sanm
Mé zami, mon bann dalone-dalon, mon bann kamarad, la mor lé kriyèl kan èl i anlèv anou in gran maloyèr. Zordi sé tiloun ki sava, k’i sava l’ot koté la vi, k’i désote. Li lé mor sinkantéin an solman, in laz in lartis néna ankor bokou pou doné.
Tiloun zanfan La sours
Son déstin la vouli fé grandir ali dann kartyé La Sours, in kartyé la kiltir kréol La Rényon téi bouyone vèye pa koman. Dann kartyé-la dann tan son zénès lété posib trouv dsi son shemin Alain Peters, Maxime Lahoppe et sa dalone Benoite Boulard, la family Ducap, lo gran Henry Madoré. Lété posib galman trouv dsi son shomin Arno Dormeuil, Jf Gang épi tikok vellaye tiloun la travaye in bonpé avèk. Animatèr dann shomin Tiloun la aprann la mizik, la dans, pèrkisyon, é sirtou nout maloya k’lété pa tro loin konm lésprésyon nout kiltir é tousa dann foiyé La sours. Demoun la konète ali galman konm animatèr dann shomin é sak zot i rotien souvan défoi dann son pèrsonalité sé son zénérozité épi l’amour li l’avé pou l’ moun abandoné, shien pèrdu san kolyé, in lidantité va kontinyé kol dsi li tout son vi ziska la finisyon zordi lo sink zilyé 2020.
Tiloun in gran an parmi bann gran
Tiloun dopi lontan I ékri bann fonnkèr épi bann parol Maloya. Sin-Pyèr laba, li la konète é mèm travaye avèk Firmin Viry la inform ali dsi la filozofi nout maloya. Mé li lété si tèlman sinpl épi si tèlman modèst ké pandan lontan li a pa fé in disk. Kan son bann dalon téi di ali, I fo fé in disk, lartis lété pa présé. Pétète bann zévènman Chaudron l’ané 1991 la fé shanj son poinn vizé dsi lo mésaz li l’avé li osi pou fé pasé. Pétèt lankourajlman bann zartis li téi rankont la ède ali in pé pou sort dann son kokiy. I fo dir, dann tan-la li téi frékant bann zartis koni isi La Rényon, épiosi désèrtin dann lo mond antyé : l’avé ziskakan épi Gilbert Pounia, l’avé osi Danyèl Waro, Firmin viry é d’ot ankor.I prétan nout gran Daniel honoré la influans ali in pé. Pti lanp-Ti lanp Tiloun-Jean Michel Ramoun-la vni gran an parmi bann gran avèk inn an parmi bann pli zoli voi nout maloya rényoné.
Lo lartis dann lésplozyon tout son kapasité
Momandoné, Tiloun i désid lans ali dann la vi d’artis rouvèr dsi son piblik. La matyèr i mank pa li : li, la fine ékri asé d’fonnkèr, asé d’maloya, li la fine zoué dann kabar : lé bon pou li rouv son kèr épi son shanté dsi son piblik. Avèk in bann zami, li fé son group dé pate atèr, avèk sa i fé l’anrozistroman in Cd pou difiz son bann parol angajé an réspé nout lang, nout filozofi, nout lidantité rényonèz. Li shant galman bann zoli fonnkèr, in maloya bèrsèz, li la fé l’ané 1989 pou son zanfan é sa i done » Dodo Mon pti kok » akonpané par in zoli mizik.
Astèr l’artis koni é rokoni.
Astèr li anshène bann féstival : Jerusalem jazz festival,
Sakifo, la sacem i done ali lo pri Fanal, épi ala astèr son dézyèm cd avèk bann mizisien malgash é sa i donn « Kas in poz ».
Avèk « dé pate atèr » li anrozist 11 tit, l’ané 2008- avèk « Kass in poz » katorz tit l’ané 2011. Apré sa i oi ali dann son bann konsèr : Sal Wladimir Cantèr, Palaxa . Tiloun é lo bann matant » li lé dann Marsèye, aprésa Sin Pyèr, aprésa ankor Printan de bourges.
Dë foi li roganiz la nuite lo maloya dann téat dsou bann zarban solidarité bann shagosien i vé vanj pou rotourn zot péi. l’ané 2018 li shant Sint-Sizane pou akèye in délégasyon bann shagosien.
Tiloun, ou la parti, mé ou la pa viv pou rien. Ou i lèss pou nou in bann zoli fonnkèr, é in bon kantité zoli maloya. Ou i fé zordi parti la kiltir rényonèz é mi pans bann jenn va résite aou, épi va shant aou lontan. Landroi ou i lé déza, mi pans ou va kontinyé suiv travaye bann zartis rényoné é nou niora touzour in rogar dsi la fason ou téi oi La rényon, nout lidantité, nout kiltir. Mi éspèr, pou mon par, ou va kontinyé dopi landroi-la fé valoir nout kiltir rényonèz., don knout péi La Rényon…
In kozman par Justin
Bann modékri andann forom
6 zwiyé 2020, 11:23, sanm oscar
j’ai eu l’occasion de le côtoyer, il y a longtemps.
bien sur il a beaucoup fait pour le Maloya ; mais pas que.
Il s’est aussi beaucoup investit pour aider les jeunes de son quartier et les autres.
Je me souviens, particulièrement, d’une de ses interventions bénévole sur un stage BAFD.
Un modèle, de réalité, d’humilité, de fierté et surtout d’humanité.
c’était un grand monsieur