Mézami dan la vi néna dé shoz lé sir, néna dé shoz lé pa sir ditou, é néna dé shoz lé sir konm pa. Tanka tir boudin kui dann vante koshon, lèv bonèrsi wi vé, dor tar si wi vé, mé la poin arien d’ sir ladan.

In tan issi la Rényon bande démarshèr l’avé la répitassion manipil demoune épi fèr tèl fasson ké demoune, san konprande ni ou, ni kan, ni koman, zot i trouv azot angajé dann in krédi souvan défoi téi pèye dé-troi foi son kor. Koméla, normalman sé dé shoz k’i pé pi fèr pars lo krédi lé bien ankadré.

Mé sa i vé pa dir demoune i tonb pa ankor dann pyèz mé d’in koné konm dan l’ote, boudin kui dann vante koshon sa lé pa assiré.

Alé ! Mi kite azot rofléshi par zot mèm, é ni rotrouv pli d’van ; sipétadyé.

Justin