Mésyé, médam, la sosyété,na poin lontan moin té apré ékout in shanson téi di konmsa :tir malol dann zyé ,rényoné ! Moin la touzour domann amoin kosa sa i vé dir, si sé in bien,sansa si sé in mal.Moin la parti oir dann diksyonèr Alain Armand, épi dannn somi-lo mo Daniel Honoré é oila kosa moin la trouvé :in bataye dé lékol mi di azot.

Pou diksyonèr Armand sa i vé dir : « rouv ton zyé pou oir klèr », « sort dann l’avègleman ».Donk sé in bone afèr !Mé moin la lir dann somi-lo mo Daniel honoré, « si ou i bate lo zyé i tir la mote-la mote avèk malol sé lo mèm zafèr » pou mète an gard kont la rapidité in moun.Pli vif pli trète ! Donk ala in dézyèm lékol é lé dé lé pa dakor.Moin pèrsonèl sa i fé pa moin arien : si lé dakor, lé dakor, si lé pa d’akor lé pa d’akor é sak lé pa kontan li naka pran konstan.

Alé ! Mi kite azot rofléshi la dsi é ni artrouv pli d’van.
 !