Na in patoi dann la lang fransèz i anparl « larm krokodil ». I prétan, i di sa kan demoun ipokrite i fé sanblan lo malèr d’moun i toush azot, alé oir la pa vré. Mi koné pa si krokodil i plèr, sansa si li plèr pa. Mi koné pa si i ariv ali d’ète trist sinon si sa i ariv pa li. Mé sak mi koné, sé ké l’ipokrite, sa sé in n’afèr i mank pa dan nout sosyété. I diré zot i fé toute pou fé ariv lo malèr, é kan malèr lé la, ala k’sé zot k’i tir moushoir an promyé. Mi vé anparl désèrtin médya épi désèrtin politik.

Kan Paul Vergès lété prézidan Konsèy réjyonal, la kriz té i ménas. Pou évite in katastrof pou La Rényon, l’Alyans la déside fé fèr bann gran shantyé : tram-train li, MCUR li, lo pon dési la rivièr Saint-Etienne, rokade Tampon, kontournman Grand-Bois, plis ankor lo plan pou bann lisé, l’otonomi dann l’énèrji, insi d’suit, insi d’suit. Kan tout fors, l’ané 2007, gouvernman la rode kapote l’Alyans pou mète anlèr l’UMP avèk Didier Robert, tout sak lo zyé té pa tro boushé, é lo sèrvo pa tro anklavé, la konprann kosa té i sava ariv nout péi. L’èr-la, bann télé la boykote Paul Vergès, bann zournal la bate tanbour pou bann krokmor nout dévlopman, é la mète anlèr la kaskade vizit bann minis dési La Rényon. L’èr-la, tout sak té i pé afébli l’Alyans, bann zournal la droite la mète anlèr.

Kan Didier Robert la fé son promyé kozman Konsèy réjyonal, té fasil pou konprann la katastof té i ariv, mé bann télé épi bann gran radyo, épi ankor bann gran zournal la fé konmsi zot té i oi pa arien arivé. I fo dir osi, l’UMP l’avé le zo pou zot sisé ! Lo tan la pasé, in bann gran shantyé la pa rouvèr, l’otonomi énèrzétik lété ataké, shomaz la roparti an avan. La mizèr noir la goumanté é gouvèrnman Sarko la pa fé arien pou soulazé. Lo RSA té ankor pli pir ké lo RMI. L’èr-la, tout lo bann l’avé fé sak i fo pou déklansh la kriz for-mèm, zot la mète a trouv demoun i fé pityé, zot la mète a tir moushoir épi a vèrs larm krokodil.
Tir moushoir ! Tir moushoir ! Mé sa i ansèrv de riyin.

NB : Konm in vyé gramoun té i di : « Lé tro tar pou sèr la fès kan la fine fé dann dra ! ».

  Justin