Ala in konsèye, mi koné pa si li lé bon pou vréman-sansa si li lé pa bon-pars kosa sa i vé dir ? i vé dir, sanm pou moin, i fo pa fé dë shoz an mèm tan. Poitan, dan la vi, mi pans pa i gingn fé in sèl n’afèr in sèl kou, pars la plipar d’tan ou lé okipé fé dë shoz, sansa plizyèr, an mèm tan… I paré l’avé in prézidan l’amériki téi gingn pa mash schwingom épi kourir an mèm tan, sansa kozé épi kourir pars li té i tonm atèr souvan dé foi dovan bann kaméra. In pé va di lo boug té fine manké ! D’ot va di si li téi fé in sèl zafèr li nora vni abou konsant ali bien dsi in sèl zafèr é nora pa ariv ali sak l’ariv ali souvan dé foi. Mé, pou mon par, mi profèr konsèye azot bien rofléshi dsi provèrb-la. Konm in pé i di : shakinn i oi l’èr dsi son révèye. Alé ! rofléshi bien éni artrouv pli d’va. Sipétadyé.