Mi ansouvyin in zistoir na byin lontan sa la éspasé, in zistoir vré ! La pa inn krak, la pa non pli in kou d’pintir, ni in ramas mantèr, vik moin la tandi èk mon dé zorèy, vi avèk mon dé zyé ; pa santi, pars dizon sé in zistoir san lodèr, mé pa san gou, ni santiman.

Donkalor, in vyé madam, in pé pèrdi, in pé zété, in pé ramasé, lavé vni la kaz in moun. L’ot lavé parti, bate son karé. Lo vyé madam lété rousté, mi di azot !
Akoz ? Pars dann lo kaz lavé poin do ri, lavé poin do sèl, lavé poinn luil, zalimèt, ou byin savon, étsétéra, étsétéra, la ké lo ra… Èl té i di : « In kaz konmsa, la pa in kaz ! »

Zordi mi rapèl sa, akoz mi sort agard in piblisité, an koulèr é tout, avèk in kantité marshandiz, in takon produi, in miryad zafèr. Lé byin d’apré zot ? Sof ké la poin anndan sak mi trouv lé lo pli nésésèr : sak moin la di an o la, épi na poin lo grin, na poin boukané, sosis, pimann na poin pom-tèr ; anfin, na poin sak i fo pou in Kréol ranpli son bouzaron.

Alor mi di dann moin mèm : kosa k’i ansèrv in pilisité ousa k’ i trouv pa, moindroman, son kontan, é i trouv aryink la faribol ? Mi pans an avoir konpri pou kosa : sé aryink iz mon larzan, konm i tir sosis kui dann vant koshon.

Justin