Matante Zélida la ékrir Justin :
Mon shèr nové, mon spès salté,
Mi oi bien zot, bann rouj-de-fon, zot lé mové pèrdan. So kou issi, sak zot i konpran pa sé ké Didier Robert i vé pran lo pouvoir Air Austral. Mé sa lé normal. Sé li k’la gingn lo zéléksyon kant mèm ! D’apré zot, sa lé pa bon pou La Rényon. I fo kant mèm aspèr in pé pou konète si lé bon, si la pa bon. I fo pran in pé pasyans... La pasyans, sa i guéri la gal. Tok ! Pran sa pou toi.

Justin la fé pou répons :
Mon vyé matante k’i koz touzour la boush rouvèr,
Ou na touzour in fasonn byin a-ou dé oir lé shoz, mé konm mi di aou souvan, vi voi pa pli loin ké lo boute out né.
Pou komansé, lété pa oblizé fé vilin manyèr konm li la fé èk madam Nassimah Dindar. Konm moin la fine di, li la fé in kou d’fors, san sousyé la politès, san inkyète pou la galantri. Poitan, tousa-la, sa lé né avan nou !
Dézyèm z’afèr pli grav. I diré li la fine pran z’intéré pou Air France épi Air Mautitius. Konm di l’konte i arsanm, mi éspèr lé pa vré, mé li fé konmsi li vé bate Air Autral a-tèr. Poitan, sé nout konpagni, sé èl k’i sava partou dann lo mond, é pa aryink dann l’Érop. Sé èl k’i marsh byin, alé oir k’in pé, pou l’instan, lé konm k’i diré in bann kanar boité !

Justin