Si mi di azot mwin la fine konète in bonpé pèst issi La Rényon mi panss zot va kroir amwin : étan pti mwin la gingn la roujol, la koklush,la vérète. Mwin la konète gingn la fyèv palidéène, puss véra,la polio, aprésa la deng, shikungunya, lo covid mi panss pa mwin la gagné. Bann maladi-la té plito zantiye avèk mwin é na pwin inn dan la bann la gingn koupe mon fil la vi.

Antouléka kan mi kalkil mon bann maladi mon souvnir sé ké ma soign amwin avèk bann trètman modèrn mé avèk sa la arzoute in pé tazantan bann médikaman gran-mèr. Astèr plizanplis mi antan bann tizane plante i pé pèrmète soulaz bann pèst mwin la gagné. Si mi di azot noni sansa malaye zot i koné sa, si mi di azot domyèl zot i koné sa i fé d’bien, arzoute èk sa tizane fèye papaye, fèye gouyav mi panss zot i koné kossa i lé.

A ! biensir mwin lé pa in konéssèr késtyon plante, késtyon tizane ou d’ote ankor mé mi di azot franshman mi pran tizane kan mi panss i fo prann pou soulaz mon santé é si néna in marmaye la kaz : la gingn lo vèr ébin li pran son doz konm ninporte de ki. Défoi mi domann si an parmi sak mi done osinonsa sak mi pran na pwin in pé i kontrodi lé zot é mi méfyé bann zéfé kontrèr mé sa anpèsh pa mwin pran tizane gran-mèr.

Alé ! Mi ankouraz lé z’inn é lé zote pou pran bann tizane sinp an pliss médikaman doktèr é mi kroi la klé noute santé sé in pé noute divèrsité,a bon antandèr salu !