Moin la fine komans rakont azot zistoir Tizane i yèm bien in pé tout kalité lo frui néna isi La Rényon. Pou dir azot la vérité Tizane èl i rafol lo frui si tèlman k’i pé dir èl soufèr in zann maladi vi k’èl i ariv pa s’an passé. ladiktyolozi. Mé antansyon, son bann frui èl i sava trap sa dann pyé Piton Boi d’Nèf, dann li la ravine blansh épi dann fon la sours Kato é l’androi-la Grandyab souvan dé foi l’apré bate son karé dann in ron é si li la trap aou,fini pou ou-kaokoun !Li manz aou kru konm la shèr frèsh.

L’avé inn foi mésyé lo foi , la manz son foi èk in grinnsèl

Donk lo zour mi anparl azot la, zour-la lo Grandyab l’avé dor poin fèrmé tout in l’aprémidi é kan li la lévé li lété movèz imèr, sirman pars li l’avé fain.Arzout èk sa, kan li la fain li donn kalité kou d’kriyé : sa i sokouye la foré,sa i fé tranm pyé d’boi. zoizo i pran z’ot vol an foufou dann tout dirésyon.Kan momon Tizane la antann klriyé grandyab li la kriye son zanfan : "Tizane, Tizane, rant aoul la kaz mon zanfan !" Grandyab l’apré batifol dann la kanpagn ! antansyon si ou i rès déor ankor konmsa, Grandyab i sar manz aou kru.

Ala ke Tizane i fé pou répons : "Ma mère, moin l’apré manj mon frui é mi oi pa koman lo vilin Grandyab va gingn anpèsh amoin manz mon frui…" Tout fason moin la poin la krintiv dé li é lo zour la pankor lévé pou in bébète anpèsh amoin amenn mon vi konm mi antan. Aprésa pou amontr koman èl lé bon, épi koman èl lédésidé, èl i di èk son momon : alé rode Grandyab ou é ou va oir si mi mète pa li inn pil, ébin moin va mète ali dé.. Son momon la pans èl l’avé in bonpé toupé pli k’i anfo mé èl la mète sa dsi lo kont l’ignorans é èl la sinploman signal son mari.

Son mari, donk papa Tizan avèk Tizane la parl aèl,la di aèlrant dan la kaz si èl i vé pa Grandyab i souk aèl. Souk aèl la réponnn Tizane,sa i fé konmsa don sa. Tout fason la pa in vilin Grandyab pou anpèsh aèl manz son frui... An atandan, èl i désid rèss déor é pa rant son kaz avan k’i fé noir pou vréman.

Kriké ! Kraké !Kriké Mésyé ! Kraké Madam !

Par l’fète zot i koné la boush i di n inport kosa é la lang, konm i di lapoin lo zo.Mé ni koné galman o pyé di mir i oi lo mason toudinkou Tizane la santi konm in kouran l’èr sho é santi mové, par déyèr son kolé.San pèrd son tan ala ké lo Grandyab i anval lo Tizane ; Fouti pou èl ! Zis lo tan pou débate in pé dann vant Grandyab.

Débaté, débaté, afors débaté toudinkou Grandyab la santi ali mal avèk in zafèr i bouj konmsa dann son léstoma. Si tèlman lo Grandyab la gingn konm in gastro é pou soulaz ali li la anvoye par an-o, par an-ba, par an-o, par an-baZiskatan, alé konprann si zot i péTizane la sort dann léstoma Grandyab. Mi soré dir azot si li la sort par an-o sansa si li la sort par an-ba, mé fransh vérité èl la sorti é èl la lèss Grandyab dann in mové postir.av èk in tète i fé mal, avèk in l’anvi d’vomir vèye pa koman, in tralal a pa dir koman.

Tizane kont grandyab :in zistoir pou tir la krintiv dan la tète marmaye-
Dézyèm bout la fini-Astèr ni sava oir troizyèm.

Justin