Médame, méssyé, la sossyété, koze èk mwin sé koze èk in kouyon, mé sé o pyé d’lo mir k’i oi lo vré masson.

Mézami mi pé dir azot dan la vi, la pa in sèl foi zot va tonbé pars la natir imène lé pa fé pou anpèsh anou tonbé-l’atraksyon térèstr sa i égziss... Etan pti noute momon avèk noute papa va dir anou kour pa kour pa ou va tonbé.

Poitan si i vé grandi i fo wi kour, i fi wi sote, i fo wi bouze pou tire la molèsse dann out kor. Sé konmsa ké wi grandi é ké wi forsi... Mé la vi i aprande aou in n’afèr kaziman in trézor : el i di aou si wi tonbe rolèv é sa sé lo méyèr konsèye èl i pé done aou.

Dann judo wi aprande tonbé pars sa sé la baze de la baze. Wi aprande tonbe san fé mal aou si possib. Wi aprande bien tonbé pars opliss wi tonbe bien, opliss wi arlèv vite é sé sa ké va fé gingn aou.

Tonbé-lévé, mi domande azot rofléshi la dsi – toultan rofléshi la dsi é ni rotrouv pli d’van. Sipétadyé.