Mésyé Macron la anvoye dé pti mo in madam 73 zan blésé dann in manifésyon dann la vil Nice pou di li pran bien par son dézagréman. Mé sa sé pou komansé pars lo foutan i vien apré : li konsèye aèl d’ète in pé pli saz dann l’avnir par raport son laz.

Astèr si mi konpran bien ou i doi lèss gouvèrnman plime aou, san di arien é si posib ratiboiz out rotrète la plipar d’tan lé pa si for ké sa. Si mi konpran bien, kan ou lé in pé azé, ou i doi lèss lé zot manifès pou ou konmsa si i gingn in n’afèr arienk an réstan la boush rouvèr. Si mi konpran bien in pèrsone azé i pèrd son droi pou li done son avi si i fo dann in manifèstasyon.
Mi pans arienk pou sa lo prézidan i mérite in plint dann son zansiv pars li dényé lo droi in pèrsone pars èl lé azé. Si sa i apèl pa la ségrégasyon par laz, l’èrla mi koné pi koman sa i apèl.

Astèr moin lé pou poz azot inn-dé késtyon :
- Lakèl lé pli danzéré, in ti kolon soisant trèz an, sansa in dirizan noré lo mèm laz ? Lakèl lé pli danzéré – mèm laz, mèm laz-in madam san pouvoir avèk in n’ot néna lo pouvoir anrishi ali, épi tir la lène dsi l’do sak lé san défans ? Lakèl lé pli danzéré rant in jenn bononm la désid in foi pou tout mète ali dann kan milyardèr kont la mazorité d’moun o flan par raport in maniféstant in sèrtin laz ?
- Lakèl lé pli insolan rant in prézidan i mète tout son kalité komantèr dsi lo touit, par raport in madam i sava kriye dann shomin èl lé pa dakor avèk bann zésploitèr ? Moin néna mon l’opinyon é mi pans zot osi zot néna la z’ot.

Si ni konpran anou bien, si bann moun azé i doi lèss la plass bann moun ou i pèz dsi zot né dolé i sort ébin néna d’moun o plasé i doi alé, débarass lo planshé. Aprésa, moin néna ankor in n’afèr pou di, mé sak i konpran i konpran, sak i konpran pa i konpran pa. Zis in lésprésyon kréol I di konmsa : torti I oi pa son ké. Comprenne qui pourra !