Mi panss mwin la fine anparl kozman-la néna in bon boute tan, mé konm mi sort lir sa par la plime in léktèr Témoignages, mwin la konm anvi ardi dé mo la dsi. Dabor pars si torti lé konmsa, sa i doizète in nafèr ki strèss ali bonpé. A moinss ké li s’anfoutsa mé sa sé in n’afèr k’i dépass amwin. Koze la plass in tortu, rofléshi konm in tortu, rante dann la psykolozi in zanimo konmsa, mi doi dire azot sa lé tro for pou mwin.

Solman lé vré toute zanimo, a komanssé par nou mèm, normalman ni oi pa tout bann boute nout kor, mèm l’ékstèryèr. Donk nou lé pa méyèr ké tortu, sans prop mé dsi la késtyonn sans figiré ni pé di, ni oi fasilman défo lé z’ot mé ni oi pa vréman la n’ote. Antouléka ni anparl pa sof pou dir ni yèm bien nout défo é nou lé fyèr d’sa. I parétré lé pli fassil pou nou oir in paye dann zyé nout voizin k’in poto dan la n’ot.

Konm zot i romark sa sé in n’ot kozman pou anparl, sanm pou moin, lo mèm z’afèr.

Alé ! Mi lèss azot réfléshi la dsi é ni artrouv pli d’van sipétadyé.

Justin