Lo roiyome-vilaz lé zanimo la rogingn dolo mé oila k’in nouvo kontrotan i ariv : néna kèlk’in i vien la nuite pou sali dolo lo rézèrvoir. Lo lion roi bande zanimo l done in mission shoval épi la di ali :

« Shoval, sé mwin ton roi k’i done atoué lézord : Anpèsh sali dolo é si i fo arète lo rodomon k’i fé sa ».

Shoval i pans li lé kapab ranpli lo mission épi li instal ali bordaz bassin kan lo soir l’arivé. Sirpriz li oi lyèv arivé é i propoz ali in gran boutèye do myèl si li vé.

L’avé inn foi pou inn bone foi, méssyé lo foi la manz son foi avèk in grin d’sèl.

Ala lyèv i koz avè shoval é li di : « shoval ! shoval ! Mi vé bien done aou in gran boutèye domyèl, mé pou sa mwin sar blijé amar aou pars mi koné ou la fine promète amwin in gran kou d’sabo dan la guèl épi anvoye amwin dingué ! »

Shoval i aksèpe, é lyèv i amar lo dé pate dovan rantre zot, lo dé pate déyèr rantre zot épi ansanb sète dovan. Aprésa i amar la tète shoval avèk son pate. Kan lé fini, lyèv i apiye dsi shoval, li boir lo myèl épizapré li rante dann bassin d’lo, li farfouye lo fon épi i tarde pal o lé fine sal épi pou konplète lo tablo li piss épi li kaka dann bassin.

Kan lo zour i lèv, bande zabitan i apèrsoi, ankor in foi, dolo sal é i pi mové i koul dann robiné. I tarde pa bande zanimo i sava oir lo roi épi zot i rakonte zot maléré sor.

Kriké ! Kraké ! Kriké Méssyé ! Kraké Madam !

Lo roi i déside alé oir kouk i éspass dann bassin. Li marsh dovan é lé zot i suiv déyèr é kan zot i ariv a koté lo bassin zot i oi lo sal é pyan, épi lo pov shoval amaré dsi lo bor bassin si tèlman ligoté ké li pé près spa bouzé. Bande zanimo i komanss par démar shoval épi zot i nétoiye lo bassin.

Aprésa i domande shoval kossa l’arivé. Shoval i réponde in paké monstré l’atake par sirpriz épi l’amar ali. Lo roi lé dépité, mé konm li lé roi, li lèss pa oir son dépitassion. Toutsuite pou toutsuite li done bèf lé zord pou protèz lo bassin é bèf lé bien dakor é li di mèm : « Mon dé korn va amontr bande monstré kossa i pé ariv azot si zot i kontinyé sali lo bassin d’lo ! ». Gran bravo pou lo déklarassion.

Dozyèm morso la fini, samdi proshin nou va oir lo troizyèm.

Justin