Lion, lo roi la done bèf lé zord pou protèz lo bassin. Li la di : « Bèf mi done aou lé zord pou gardien bassin d’lo épi mète a la rézon bande monstré i pass lo tan pou sali dolo ! ». Bèf lé bien dakor é li di mèm : « Mon dë korn va amontr bande monstré kossa i pé ariv azot si zot i kontinyé sali lo bassin d’lo ! ». Gran bravo pou lo déklarassion.

L’avé inn foi pou inn bone foi méssyé lo foi la manz son foi èk in grinn sèl.

Solèye la fine lav lo pyé. Bèf i sava instal ali koté lo bassin d’lo : li lé kontan, li lé sir d’li, li kalkil déza li sava bataye avèk bande monstré pou lintéré zénéral toute bande zanimo : protèze lo bassin d’lo épi garde lo bien prop... I komans fé noir é kossa bèf i oi ariv an missouk, lyèv l’arivé, in gran boutèye do myèl avèk li. Li di : « kossa wi fé la ? fil aou sansa mon korn pointi ou va konète ! »

Lyèv i di avèk Bèf : « Pa bézoin pran la kolèr si mi vien tienbo aou in pé konpagni ! Mwin l’amenn in boutèye domyél é nout dé ou va partaz sa ansanm ! »

Bèf i rofléshi in pé épi li di li lé dakor, mé lyèv i fé romark ali : « Bèf, tousala lé bien zoli, mé wi sorte ménas amwin kou d’korn é oute korn i fé pèr pou vréman ! I fo wi lèss amwin amar oute korn avèk out pyé. Aprésa nou va boir domyèl tou lé dé ansanb ». Lé dé i komanss diskité : gasparin-brunet-brunet-gasparin. Aprésa i fini par tonb dakor. Bèf la di li lès anmar ali pars li lé tro anvi boir domyèl.

Bèf i di oui épi i lèss ali fèr. In néstan lo gro bèf lé anmaré par lyèv an kroiyan isava paryaz domyèl avèk li.

Kriké ! Kraké ! Kriké Méssyé ! Kraké Madam !

Kan li la fine anmar bèf, lyèv sé d’mète a foute sa tète. Aprésa li assiz dann zèrb épi li boir lo myèl san done in goute lo pov Bèf. Kan li lé fini, li sote dann bassin, li grouye lo la bou, li piss dodan, li kaka.

Morson niméro 3 la fini-somenn proshène nou va oir katriyèm boute. Koton mayi i koul, rosh i flote ! l’avé inn foi pou inn bone foi méssyé lo foi la manz son foi èk in grin d’sèl.