Ankor in foi lo al i koul dann robiné. Ankor in foi band zanimo i sava oir zot roi pou dira li lo lé sal é i pé pa ansèrv in lo konmsa. Lo roi k’i pran son rol o séryé i di lo band la vnï oir alï : « Mézami alon bassin d’lo pou oir kossa l’ariv ankor ! » é toute la band i monte o bassin.

Kriké ! Kraké ! Kriké Méssyé ! Kraké Madam ! l’avé inn foi pou inn bone foi, méssyé lo foi la manz son fi èk in grin d’sèl.

Kan toute zanimo i ariv o bassin, kossa zot i oi : Bèf amaré prèss dann linpossibilité pou bouzé. Zot i démar ali, épi konm lo lé sal dann bassin, zot i nétoiye lo bassin.aprésa lo roi i domand bèf : « Bèf kossa l’arivé ? kissa la mète aou dann sète éta ? é kissa la sali dolo ? »
Bèf i fé pou réponss : « Mon Roi mi jure aou, mwin la pa konprande arien. In bande monstré la sorte par an-o, in n’ot bande la sorte par an-ba é oila. Lo rèstan mi pé pa dir aou arien. Sirman mwin la pèrd konéssans. »

Lo Roi i konpran pi arien mé so kou issi li arvir dsï tortu é li di : « Tortu, mwin out roi mi donn aou lé zord pou mète bande monstré a la Rézon épi protèze nout lo ! ». Aprésa, kontan avèk li mèm li rotourn dann son palé é bande zanimo i kontinyé trankilman zot zourné.

Kriké ! kraké ! Kriké Méssyé ! Kraké Madam !

Tortu, son koté, li prépar ali pou la nuite. Dabor li rode in bonpé la kol forte avèk bande pinso épi li di bande zanimo, pass in bon koush la kol dsi son kok. Banna i fé é lo zanimo saz i sava koté lo bassin. Li shoizi in bon plass pou li instal ali é li rante dann lo. Son kok i briyé vèye pa. Inposib pa romark in kékshoz konmsa. : in bèl galé luizan marron kaziman noir bien instalé dann lo.

Solèye la fine lav son pyé : Lyèv i ariv an siflan, li rogard lé zalantour é li oi pa arien. Dann son kèr li ri, li ri mèm épi li pans : « A ! Banna la ronons défande zot lo, sa i anpèsh ar pa mwin sali ali, épi fé mon bézoin dann bassin. Mwin lo lyèv robèl m’a amontr azot kèl koté brinjèl i sharj. »

Aprésa li rogarde bien épi li oi in bèl galé briyan dann lo. Li pans sa i sava ansèrv ali pou pik in tète dann bassin. Li pran son lélan, li fé in voltaz épi li tonb, dë pate aryèr dsu lo bèl rosh briyan-par l’fète dsï la kok tortu.

Morso niméro 4 la fini-somenn proshène nou va oir sinkyème boute. Koton mayi i koul, rosh i flote ! l’avé inn foi pou inn bone foi méssyé lo foi la manz son foi èk in grin d’sèl.

Justin