Ankor in foi lo sal i koul dann robiné. Ankor in foi band zanimo i sava oir zot roi pou dir ali lo lé sal é i pé pa ansèrv in lo konmsa. Lo roi k’i pran son rol o séryé i di lo band la vnï oir alï : « Mézami alon bassin d’lo pou oir kossa l’ariv ankor ! » é toute la band i monte o bassin. Promyé gardien lo Roi la done mission, shoval, la éshoué. Dézyèm gardien lo roi la done missio, bèf, mé bèf la éshoué. Lé dé la rakont in band monstré la atak azot épi la anmar azot. So kou issi lo roi la done tortu in missyon pou arète lo band manstré épi mète in poin final a so késtyon d’lo la.

L’avé inn fo pou inn bone foi méssyé lo oi la manz son foi èk in grin d’sèl !
Tortu mi pans zot i rapèl la fé pass la kol forte dsu son kok épi li la rante dann lo, trankilman. Li bouj pi, li atande band zagréssèr. Mé oila lyèv i ariv é li romark, sanm pou li, néna pi gardien d’lo, sof in bèl galé briyan lé dann lo soir-la é lété pa la zisk’issi. Li trakass pa, li kalkil sa in gayar landroi pou pik in tète dann lo é sé sak li sava fé.

Kriké ! Kraké ! Kriké Méssyé ! Kraké Madam !

Lyèv i pran son lélan é li sava poze son dë pate déyèr dsu lo galé pou li plonjé. Mé kèl plonjé vu k’ son dë pate déyèr lé pri dan la kol. Li grongn, li sobate, mé arien a fèr, li gingn pa dékol son pyé. L’èrla li flank in kou d’poin gosh-son poin gosh i rèss kolé-in n’ot kou d’poin droite so kou issi mé son poin droite i rèss kolé. In kou d’tète, la tète lé kolié. In kou d’déyèr é lo dèryèr lé kolé.

Tortu dann lo i bouj pa, é kan li romark pèrsone i bouz pi li sorte dann lo épi klok, kolok, kolok, klok li déssand dann vilaz... La nuite i sorte tonbé mé band zanimo lé ankor révéyé. Toute bann sizé i rassanb é zot i oi sak zot i oi : lyèv lo rodomon kolé bloké dsu la kok tortu ; Lo roi i ariv :
« A bon ! li di, ala lo bande monstré-la. Shoval ! bèf ! zot la pa onte rakonte dé krak zot Roi ; Rozman tortu la kol lyèv-la é dopi lontan mi rode ali. Alé ! mon band sizé dékol amwin so saligo-la é fouté-moi sa dan la jol »

Ala lyèv lé dan la jol mé listoir i arète pa la.

Koton mayi i koul, rosh i flote,
L’avé inn foi pou inn bone foi méssyé lo foi la manz son foi èk in grin d’sèl. Sinkyèm morso lé fini. Alon oir la suite samdi proshin.

Justin