Dann in n’ote pèryode i pé z’ète in n’ote. In tan mwin téi di : « Mi mète pa mon kiyèr sal dann manzé i kui pa pou mwin » é kan mi ropanss sa, mi di dann mon kèr sirman in pèryode mwin té pa la èk sa — in pèryode mwin téi yèm pa maye-maye avèk sak d’ote téi fé..

Finalman d’ète akonpagné dan la vi par bann kozman la lang mon péi sé inn idé mi trouv lé valab pars final de konte la vi i mérité d’ète kadré é mi panss dann nout lang néna sifizaman d’kozman pou bien ankadre la vi.

Arzout èk sa mi doi dir azot bann kozman la lang mon péi sa i pèrmète rotrouv amwin dann bann konsèp filozofik finalman dann bann règ de vi é mi trouv sa lé assé intéréssan.

Kossa zot i anpanss zot ? Mi koné pa bien ozist mé konm mi di azot sa i pé z’ète in fasson pou zot ossi d’rotrouv azot dann zot vi.

Alé ! M kite azot rofléshir la dsi é ni retrouv pli dvan, sipétadyé.

Justin