Z’éléksyon réjyonal la fini ? Sak la gagné la gagné ! Sak la pèrd, la pèrd. Sak la trayi, la trayi ! Sak té fidèl z’ot z’idé, té fidèl z’ot z’idé. In pé té fidèl z’idé lé z’ot san kroir pou vréman. In pé la di sa sé lo zéléksyon lo pli inportan an parmi lo pli inportan. Mé alor, pou kosa lo moun la pa parti voté konm k’i fo ? Pou kosa la pa donne katrovin pour san bann votan ?

M’a dir azot in kékshoz va fé prann amoin pou in moun tro fyèr, pétète méprizan par raport tout so bann moun la fé travay z’ot koko a fon, la fé bouy z’ot matyèr griz. In bann moun k’i koné dé shoz é sirman bien trakasé par lo déstin in bon kantité d’moun dann nout péi. Pou moinmèm nout péi lé pti, son bann problèm lé bien vré é – éskiz mon pardon-na poin pèrsone l’avé la solisyon pou vréman.

Kisa l’avé la klé pou trouv in bon solisyon pou vanj kont lo shomaj ? Kisa l’avé la klé pou donn toulmoun in toi pou anpar solèy avèk la plui ? kisa l’avé la klé pou pous nout dévlopman an avan ? Kisa k l’avé la klé pou tir demoun dann z’ot maléré sor ? Kisa l’avé la klé pou tir bann plantèr dann malizé ? Bann zènn diplomé ? Bann zènn san diplôme ? Kisa l’avé la klé pou in vi nouvèl ?… Mi di pa pèrsone l’avé poin inn-dé solisyon pou a élyor lé shoz, mé la mazorité d’moun i pans ké non.

L’èr-la, pou kosa zot n’oré parti vote an mas, pou mète in bon majorité anlèr ? L’avé poin in bon rézon pou la mazorité d’moun. Touléka lo moun téi pans konmsa.