Médame zé méssyé, la sossyété, koze èk mwin sé koze èk in kouyon, mé sé io pyé d’lo mir k’i oi lo vré masson.

Mézami, kozman mi anparl zordi sa in vyé kozman : mi diré pa li lé vyé konm Hérode mé lé vyé kant mèm. In kozman d’vyé galman. Pars si i domande in vyé kossa i di, koman i lé, ou lé bien ou lé pa bien, ou lé kaziman sur si la pèrsonne néna in bon laz, si li lé azé épi izazé, li va réponde aou konm lé marké an-o la.

Romark bien néna d’ote réponss ou réponde a d’ote késtyon : si wi domande amwin si mwin lé bien. Kossa m’a réponde ? Lo bien la poin. Si i domande amwin nouvèl mon santé, mwin lé kapabe réponde « soumak-soumak ! » sansa ankor : « ptilanp-pti lan-gan bobèsh. »... La prèv ké mi pran pa mwin o sèryé é sé in n’afèr mi yème bien.

Alé ! Mi kite azot rofléshi la dsi é ni artrouv plii d’van. Sipétadyé !