Pou sak i koné pa moin bien, m’a ésplik azot, moin sé in boug nana bonpé l’okipassion ; anparmi, moin sé in shassèr d’tang kalifié, épi in rodèr d’guèp promièr klas.... Épi, gard pa moin konmsa, moin nana lékipman k’i fo pou fé mon ti-boulo épi an avoir in pé lo konfor... Zistoman, pou sa, moin la fabrik in boukan kosté sanm la rivièr, dann bordaz la foré.
La prèv ké lé amoin ? La pa difisil, vik moin la mark déssi avèk la pintir “amoin” : na poin méyèr prèv ké sa... Trozour, avèk mon shien déméloir, moin la parti la shass. Kossa mi oi kan mi ariv koté mon boukan : in paké pil plate vid, in réstann kari tourné, do ri gaté, épi mon pti marmit ki-si-tèt, mon z’alimète fané, la sann partou, épi mon kouvèr mouyé avèk do lo... mi éspèr.
Konm in dalon la di amoin, gouvèrnman i siport pa in n’afèr konmsa vik sa i apèl violasion domisil, moin la ékri ali pou ésplik mon dézagréman, konm sa li fé rod sak la fé sa... I di pa, pou in n’afèr moin grav, la-ba dan la Corse, la anvoy zandarm par la tèr, épi par la mèr, épi par lélékoptèr pou vèy la kaz méssié Christian Clavier, épi la rash lo kro in gran polis !
Pèrsone la pa réponn mon lète ! Pétèt la pans moin té apré farsé ? A moin ké dan so péi i apèl la Frans, toulmoun lé égal, mé pliz-ou-moin ?

Justin