Oté

« Toultan k’tang i konétra pa ékrir, sé lo shasèr k’va fé son listoir »

In kozman pou la rout

Justin / 8 octob 2018

JPEG - 43.6 ko

Mi koné pa si zot la fine bien akout bann moun rotour la shass tang mé sa sé in n’afèr a viv kansréti in sèl foi. Zot i rakont koman lo shien la débisk lo tang koman li la pous son bann ti kriyé : waf waf waf. Koman lo tang la anfons ali dann son trou épi li l’atak lo min lo shasèr lété apré ral ali. Koman lo shasèr la dévir lo bébète dsi dsou épi la ral ali déor é la foute ali in do d’sabr dsi la tète é koman lo tang la kiné. Mé si té lo tang téi doi rakont zistoir-la, moin lé sir é sèrtin li nora pa rakont lo mèm zistoir. Pétète li nora parl son momon, son papa, son bann frèr é sèr mor. Pétète li nora rakont koman li la nyabou shap avèk lo modi shien épi lo modi moun. Pétète mé an atandan ni konpran pa son kozman épi li ékrir pa. Sé lo shasèr k’i ékri. Nout listoir lé in pé parèye ziska zordi é sé anou, épi bann jenn i vien apré nou pou fé parl bann san parol, pou rakont z’ot kalvèr sansa kisa va fé pou zot ? Alé ! mi kite azot rofléshi la dsi é ni artrouv pli d’van. Sipétadyé !