Mi souvien moin la antann kozman-la dann in zistoir Daniel Vabois la rakonté néna déza in paké d’zané. Mi pans désèrtin moun in sèrtin l’az i ansouvienn sa é mi pans kom moin zot la rir plin vant kan zot la antann zistoir-la. Mé a bien kalkilé kozman-la lé pa arienk pou fé rir, é mi pans in bonpé d’moun té pri pétète plizyèr kou dann z’ot vi dann l’annuiman par l’fète in kékshoz monotone kisoi dann lo vi pèrsonèl, kisoi dann travaye, kisoi ankor mèm dann la késtyonn l’amizman. Mi pans nou lé konm sa : jordu in n’afèr i ral anou, domin li ral pi anou. Sansa pétète, ni pans trouv in méyèr z’afèr pou fé, in n’ot koté. Alé ! mi kite azot rofléshi la dsi é ni artrouv pli d’van sipétadyé.