Mi souvien nana in bon koup de tan, moin té i sava Tampon pou done kour bann z’étidyan té apré aprann la kiltir popilèr kréol rényonèz. Ziska so soir-la l’avé plito bien marshé : dovine-dovinaye dos, nou la bien amizé ! Zistoir ti-Jan, vréman gayar ! z’ésprésyon kréol rényoné, dos minos ! Lo kontak té bon, soir-la moin la pass a in n’ot z’afèr : l’istoir La Rényon, l’istoir bann gran shantyé.

Moin la konm konstat in pti briz fré té i sirkil dann l’asistans kan la anparl bann z’atlyé avèk bann z’ésklav té i fé gro-gro travaye. La rout la Plène, li ! La rout brilé, li ! D’ot ankor. Mon bann z’étidyan la pa bate la min mèm ké zot lété an mine. Pou arzout ankor la difikilté moin la parl mésyé Rontaunay, lo boug lété pri, an parmi lo bann dèrnyé dann la trète ilégal.

Moin la santi konm in van la révolt dann lo sal. L’avé in n’ot amontrèr avèk moin, li la konm vol a mon sékour mé té pa sa. La bann la konm konpri moin té apré mète bann zésklavazis anlèr… L’afèr la konm aranjé é si moin la rès in pé kamu, moin la pa gingn lo kou. Aprésa moin la kalkil in n’afèr mé san dir vréman. An moin mèm moin la pans in provèrb té i di konmsa :

« Toultan ke lapin i konét ar-pa ékrir, sé l’shasèr ké va ékri son l’istoir ! » é bien antandi la fason rakont listoir i konvienn ar pa bann lapin. Sa lé sir !