Mi koné pa si zot la fine antann so patoi-la bien souvan. Mi pans mèm zot i antann pa li tou lé zour ! Pou kosa mi di sa ? Pars, toulmoun i koné lyèv i gingn ar pa ékri, é sirtou ékri son l’istoir. Pars si ou i vé konète l’istoir lyév, i fo sé lyèv k ‘i rakont aou. Malorèzman sa i ariv ar pa zordi é l’istoir lyév i pé z’ète ké pou l’onèr lo shasèr épi son kou d’fiziy. In zour, Sin-Pyèr la-ba, na in moun la domann amoin pou kosa bann z’ésklav la pa rakont z’ot vi par zot mèm é moin la réponn par kozman moin la mark an-o la. Parèy pou l’istoir bann sèrf rakonté par bann nobl sansa bann klèrzé. Parèy osi pandan lontan l’istoir bann kolonizé fé par bann kolonizatèr. Alé ! Mi lès azot fé travaye z‘ot tèt la dsi é ni rotrouv pli d’van sipétadyé !