Médam, Mésyé, La sosyété koz èk moin sé koz èk in kouyon-mé sé o pyé d’lo mir k’i oi lo mason. Mi pans moin la fine dir azot kékshoz konmsa. Nout tout i koné lo pouvoir politik la toujour marsh avèk lo pouvoir intéléktyèl é sa la pa vré solman pou la rolasyon rant demoun épi zanimo, lé vré galman pou bann rolasyon rant moun suivan la katégori sosyal : Kisa la tir portré bann zésklav si la pa bann mètr ? Kisa la tir portré bann maron si la pa bann mètr, bann gouvèrnèr épi bann tribinal ? Mèm konplis avèk lo pouvoir politik épi rolijyé ! Bann maron lété bann bandi solon sak in pé téi di. Bann zésklav té in bann parèss. Bann kolonizé in bann san konprann. Final de kont ni pé dir souvan défoi i dress kabaré po nou suivan lidé lo kolonyalis sansa lo néo li fé d’ nou, konm téi drèss kabaré pou nout bann zansète kisoi zésklav, kisoi zangazé, kisoi ankor bann ti kolon Alé ! Mi kite azot rofléshi la dsi, konmsa ni koné kisa i fé nout limaz é kosa ni rosanm dann rogar bann dominèr.. Nii artrouv pli d’van. Sipétadyé !