Oté

« Toultan lyèv i konét ar pa ékrir, sé lo shasèr va ékri son listoir »

In kozman pou la rout

Justin / 13 out 2019

JPEG - 43.6 ko

Mésyé, médam, la sosyété, mi rapèl in zour moin lété fron d’mèr Sin-Pyèr pou manj in pé anparmi bann kamarad. Sépa pou kosa, sépa koman, inn-dé la mète a parl lésklavaz épi la parl osi bann maron, koman zot téi sov dann boi épi tazantan zot téi rovien pou ramenn lo nésésèr avèk zot dan lé o. Défoi osi pou vol in fiy épi fagote in ménaz. L’èrla in dalone la poz in késtyon. El téi vé konète si té bann maron sansa bann zésklav l’avé rakont zot vi. Inn la réponn té bann blan la rakont sa, kisoi dann prosé tribinal lété lo gréfyé téi ékri, kisoi ankor bann kapitène bato dann z’ot liv de bor, kisoi ankor lo rézisèr dann bitasyon, kisoi bann zoinalis dann zournal kolonyal. Lo madam la fé la mou : sanm pou èl si lété pa bann zésklav ni bann maron l’avé rakonté lété riskab pa ète vré pou vréman san pour san. Fin fon d’lafèr, madam la l’avé rézon listoir, bann mète lété propriyétèr épi zot té i rakonté sa a z’ot manyèr. Mé koman fé otroman ? Konm i di an-o la, toultan lyèv i koné pa ékrir sé lo shasèr i ékri son listoir. Alé ! Kozé lé bon mé mi kite azot rofléshi par zot mèm é ni rotrouv pli d’van. Sipétadyé !