Inn foi, moin la antann in madam apou koz dann radio pèrkal. Madam-la, téi di konmsa : nora pi d’problèm la lang, issi La rénion, kan bann rénioné va konprann la lang kréol, sa lé « inné », sa la pa bézoin aprann lékol. Kossa sa ? Kan lo zanfan i éné, li koné koz son lang .Ay-ay-ay, mon dié ségnèr !

Alon fé in sïpozision : in zanfan kréol lé éné. Son momon i mor kan el i akoush ; épï zanfan-la la poin papa déklaré. In famy zanglé i ramass alï. Banna i koz arien k’ zanglé. Solon zot, kèl lang marmay-la va kozé ? Pou moin, marmay-la va koz la lang bann zanglé.
Mazine ankor, bann zanfan-loup. Sa zanfan zété, bann loup la grandi azot. Kan l’artrouv azot, zot té i fé ouououou, Grrrrrr !.. zot téi koz pa konm zot prop momon .

Konm di bann filozof, i fo pa konfonn « l’inné » ansanm « l’acquis ».Out lang, sa ou aprann avèk out famy, out bann kamarad, anparmi l’moun ou frékant, lékol galman.. Sa lé pa inné ! sa lé acquis ! Donkalor,shèr madam, plito k’di ninport de koi, i vo mié, tourn sèt foi out lang dann out boush.

Justin