Médam, Mésyé, La sosyété koz èk moin sé koz èk in kouyon, mé sé o pyé d’lo mir k’i oi lo mason. An parlann nout kozman mi pans sa lé valab pou vréman. Biensir ou i pé réponn in moun takotak é la plipar d’tan lo moun i réponn aou takotak galman si tèlman néna plizanplis la tansyon dann lo dispite i mank pa pou éklaté. Mé si ou i kalkil sak ou i sava di avan kozé, lé pli méyèr pars out parol i pé kalm lé shoz sansa an kontrèr fé bien mal dann in sobatkoz. Tourn sète foi out lang dann out boush sa i pèrmète aou lé dé : apèz lo konfl si sé out shoi, sansa agrav ali si ou la shoizi sète-la-sé solon sak ou i vé. Antansyon sa la pa in n’afèr i raport a l’intélizans, mé i raport in sèrtènn pratik. Soi lé konm in roflèks, soi sé in n’afèr préparé d’avans. Mi koné d’moun, mi pé dir, zot lé pèrnisyé pars si zot néna in kont pou réglé zot i prépar azot dopi lontan avan donk néna poin arien lé éspontané ladan pars sé in pratik kiltivé. Alé ! Mi kite azot rofléshi la dsi é ni artrouv pli d’van. Sipétadyé.