Mi pans néna in bonpé d’moun isi La Rényon i koné kozman-la. An touléka mon bann dalon i lir mon kozman dann zournal, moin lé sir zot i koné sa sirman. Pa pli loin k’dan la somenn moin la antann listorien Prosper Eve apré donn lo grinin l’ékrivène i apèl Kristine Angot par raport la kouyonad èl la di dsi lésklavaz dann in l’émisyon la pass dann télé…nou va arparl dé sa dann in modékri mi sava fé ; an touléka, sak lé sir, i fo port antansyon kan ou i koz.i fo ou i prépar bien out kozman pars si la lang i mète a troké lo rézilta la pa sak ou i vé. Pli pir ou lé riskab vèks demoun épi an plis fé pass aou pou in san-konprann : larg in mo tor-an-trab vèr sé in n’afèr bien danzéré. Alé ! Mi kite azot rofléshi la dsi é ni artrouv pli d’van. Sipétadyé !