Dopi inn-dé somenn bann médya épi bann demoun galman néna lo zyé braké dsi la komine Sin-Lui . I paré dann komine-la néna in mérèss lo kèr dsi la min par raport la sityasionn moun dann komine-la.I paré galman èl lé kanifyé pou la zéstyon in koléktivité é d’apré sak i di èl la déssid transform la vi dann Sin-Lui é arète avèk bann pratik bann zansien mèr.

Lo moun la mète aèl konm mérèss i doi pa rogrété sak zot la fé dézyèm tour zéléksyon pars konm lo bojolé nouvo, lo nouvo Sin-Lui l’arivé é in n’afèr moin lé sir, èl l’apré bien gonf son pla é ni pé si zot i vé oir sa in n’ot zour pars pou lo moman d’apré sak moin la antann dir dann radyo sé bann ti kolon k’i mank pa anplègn azot pars si èl néna lo kèr, i diré sirtou sé in vré krèv kèr èl l’apré fé sibir bann moun dann la komine-la.

Mi arète la pou l’instan pars mi vé pa rogard La Rényon par lo pti bout la lorgnètte, oir sé la fote kissa, koman komine-la l’ariv dann la taye Batiskaf konmsa mé mi vé plito oir si lo ka d’ Sin-Lui la pa vré pou tout La Rényon é mi pans sé sa.. Mi pans nou lé pa dann in sistèm ki ankouraz la prodiksyon épi lo dévlopman si zot i vé. Nou lé dann insistèm i ral nout pèp an aryèr.
Sé sa k’i kont pa si bann mèr Sin-Lui la dékoné sansa la pa dékoné, si la mérèss zordi l’apré amenn la komine dann in mir.Lo bann kouyonis l’apré fé i rann ankor pli grav in sistèm k’i mète anou an plin dann la tablatir an zénéral, avèk pétète inn-dé réisite individyèl.. Mé sa lé pa nouvo ! L’ané 1959 dann son promyé kongré nout parti la signal nou lé pa sové ditou é ni oi bien li l’avé bien rézon