lo gro bar an fèr téi sèrv parchok. Le boug i tonm dousman, dousman, le san i sort par son zorèy, par son né. Li lé a tèr é li bouj pi , sirman dann koma. In néstan demoun i fane, shinoi i fèrm la boutik é lo boug i rès atèr, é zandarm i di : « sirkilé ! Na poin arien pou rogardé ! »

Sa té lo tan nèrvis. Lo tan la vyolans, lo tan la frode, lo tan la vyolans l’éta… lo tan té i arpran dann nout min, komine par komine. Konbien lo tan nou la mète pou sort la-dan ? Pa arienk in zour é sète martir o moins, san konté sak pèrsone la pa fé in ka ansanm, konm listoir lo ga moin la rakont an o la… Sa sé listoir La Rényon, listoir lo pèp rényoné an pliské sa, listoir nout parti kominis rényoné… Sèl ranpar, dan tan la – é pétète zordi ankor !- par raport tout sak bann rényoné, la sibi la soufèr… Mon bann kamarad fidèl, mi koné pa si zot i majine sa, mi koné pa si sa i fé parti lo fil rouj k’i donn azot la diréksyon dan la lite, mi koné pa si zot i kalkil z’afèr konmsa, sansa si zot i fé sa, sinploman, par instinn fidélité pou la rézistans lo pèp rényoné.

Mi pans azot, mon bann kamarad, mé mi pans osi sak la trok shomin, sak zordi ankor i kroi zot i pé rash rasine nout parti dan nout pèp rényoné, fé disparète ali par isi, par laba, fé konmsi li té i kont mèm pi, li té i kont mèm pa, konmsi li l’avé mèm pa égzisté. Mi pans listoir i obli ar pa zot l’èr zot va fé lo bilan, pars a s’ki paré toulmoun in zour ou l’ot i doi fé son bilan, kansréti kan la mor i zoué kas kou dann nout do. Zour la, mi kroi zot va santi azot bien tousèl loin par raport nout parti, par raport la rézistans nout pèp rényoné…tousèl é touléka bien mal antouré.

NB Pou kosa mi pans sa zordi ? Pars mi sort lir nout kamarad Simone la gingn in kou d’galé dann son pare-briz. Mi domann si lo tan lontan i artourn pa ankor. Touléka, sanm pou moin malorozman, na ankor la brèz sou la sann.