Kan bann gran la komanss avanss in pé lékol, té zot momon so kou issi téi done azot konm korvé okipe bann pli pti. Si tèlman ké dé zané apré ni pé di toute bann zanfan la réissi shakinn pou gingn in diplôme avèk momandoné in travaye pou shakinn.

Si bann amontrèr i anparl sète afèr-la sé pars bann marmaye in famikye nonbrèz la réissi mé sé galman pars in ka konmsa lé rar é dizon sa sé in léksèpssion par rapor la plipar bann paran téi gingn pa fé gran shoz pou ède zot marmaye dann zot travaye lékol.

Yèr matin Axel Gauvin, Prézidan lofis la lang la rapèl amwin in n’afèr. Granmèr lété pa tro avanssé lékol pars d’apré sak mi kroi èl té dann lobligassion okipe son bann ti-sèr ti-frèr é kan èl la gingn in garsson èl la désside sirvèye ali dann son travaye lékol. In zour son garsson, noute papa par l’fète la domann Gran-mèr si èl téi vé fé réssité ali son lésson

Granmèr la di oui mé èl la di galman èl lé pa sir konprann lo bann lésson, mé sak lé sir si i rode karote aèl, èl i mank ar pa d’romarké. Sé pou sa mon papa la résite son bann lésson o mo pré pou pa mon granmmèr i ramass ali. Sé konmsa mon papa la plito réissi son lékol é mwin pèrsonèl mwin mla touzour panss mon gran-mèr téi koné lir épi ékrir san konète la totalité d’son savoir.

Sak mwin lé sir sé lo gran rol mon granmèr la zoué dann lo parkour éskolèr mon papa, mèm k’èl l’avé kite lékol apré lo kour élémantèr.

Toussa pou dir si la famiye i vé é si èl i trouv la métode k’i fo, èl i pé ède son zanfan dann lékol mé si èl i panss, koméla bann amontrèr lé kalifyé é ké zot i pé, zot toussèl, amene bann marmaye dann shomin la réissite lékol mwin lé sirésèrtin la réissite sar pa o boute lo shomin é nou lé pa paré pou diminyé lo ta bann zilétré issi La Rényon, san konté labssanss noute lang kréol dann linstrikssion bann zanfan rényoné mé sa i fo ni anparl souvan é lo myé possib pars sa sé in n’afèr kapital.

A bon antandèr salu !

Justin