Mi souvien kan moin lété pti. Kan té i akiz amoin an avoir fé in n’afèr é-ké moin l’avé fé, sansa ké moin l’avé pa fé-pou port la démanti, moin té i di souvan kozman an-o la. Sa i vé dir lé posib lo raportèr la konfonn amoin avèk in n’ot. Pars lé bien vré, si ou i rogard zoizo k’i apèl martin, ou i apèrsoi tout lé apépré parèy é lé vré nana inn-dé tash blan dsi la zèl. Donk alor i pé konfonn in martin avèk in n’ot ? Lé pa sir. Lé pa sir, mi di azot ! Pars moin la fine rogard martin in pé partou dan La Rényon é firamézir moin la trouv pti diférans rant lé inn épi lé z’ot : kisoi la form lo bèk, kisoi lo por d’tète dsi lo kolé, kisoi ankor lo shanté, sinonsa la manyèr li nana d’adrès aou son konvèrsasyon… Arzout èk sa, fémèl martin, moin lé sir li konfonn pa son konzoin avèk in n’ot… Sanm pou moin ! In bon konésèr zoizo la di amoin dann in bann martin li gingn fé la diférans rant inn é l’ot si tèlman ké li pé donn azot, shakinn, in nom… Pétète lé vré ! Touléka, sak mi di, i mark ar pa, é rozman, lo poin final avèk mon kozman pou la rout é mi invit azot an sèrv sa lo pli souvan posib konm sistèm pou défann azot. Kansréti pou pa k’i pèrd !