Mi souvien, in zour, moin la di in moun kozman moin la mark an-o la, é sa lé fé rir ali bonpé. Li la dmann amoin si vèr d’tèr i sèrv in n’afèr é moin la di ali oui, é sa la fé rir ali ankor plis. Li la dmann amoin si in l’éskargo i sèrv in n’afèr kan li mont dsi in mir, moin la di ali oui é l’èrla moin lé sir li la pans moin lété apré fou d’sa tète. Alor li la di amoin kosa i ansèrv ? Moin la réponn ali, sé pou prévnir bann z’inbésil i fo méfyé pars gro plui i vien. Li la dmann amoin ankor si in fin-yan i pass son tan a fé tourn son tète dann vid, i sèrv in n’afèr é moin la réponn ali sirman, mèm si mi koné pa lo finyan é kosa li ansèrv pou vréman. Final de kont, mi pans kozman-la lé vré mèm si i fo fé travaye son tète pou konprann ali bien konm k’i fo. Alé ! Mi lèss azot rofléshi la dsi é ni artrouv pli d’van sipétadyé.