Kan ou na in zanfan la santé lé frazil, i fo ou i pran prékossyon pa mète ali dann in sityasyon li lé riskab gingn in mové maladi. Konbyin foi nou la antann nout bann paran kriy bann zanfan : « intèl, sorte dannn solèy ! Intèl, mète out triko déssi ou pars i fé fré ! Tansyon la plui, tansyon la pousyèr ! Zoué pa dann lo ! ».
Sa lé vré pou dmoun, mé sa lé vré ossi pou in péi, pou in réjyon. Kan li lé pa tro an bonn éta, i fo pran prékossyon avèk li, évite pran désizyon pou mète ali dann malizé. Lé vré, nout lékonomi lété konm i di dinamik, mé lé vré ossi li l’avé poin moiyn fèr fas bann problèm nout popilasyon. Ni koné nout toute, nout lékonomi lété frazil, é té pa nésséssèr bouskile ali plis ankor.
Donk kan in mèr i di va fé gran-gran shantyé é apré i fé pi… kan in prézidan la Réjyon i ronons fé komans gran shantyé lé paré pou démaré, konm lo tram-train épi la MCUR... kan in gouvèrnman i tras in tré déssi in loi pou l’outre-mèr épi i pran sansète an pou fé in n’ote la pa sir va marsh myé, ou i pé pa dir i pran prékossyon konm k’i fo… ou i pé pa dir la ménaz nout lékonomi konm té i falé fé.
Donkalor, la kriz, sa lé réèl sa… sa i égzis. Sa lé riskab mète anou ankor plis dann malizé. Mé afèr in pé la parti fé sak zot la fé, boulvèrs nout tik-tak pou évite la kriz, anpèsh nout péi anbransh dann dévlopman dirab. Par l’fète, konm ki diré, zot la fé toute pou koup la bransh nou té assiz dsi.

 Justin