La-ba dan la France, pa tro loinn Paris, i sorte rouvèr in nouvo lékol pou troi san marmay. Mé nouvo lékol nana partou, i rouvèr toultan. Shak rantré nana nouvo lékol. Akoz anparl sète-la ? Pars sé in lékol prop. Li larg pa gaz karbonik dan l’èr, li shof pa lo klima. Arzoute èk sa, avèk son plak solèr, li va fé plis kouran ké li la bézoin. Son limyèr, son shofaz, son klime, li va fé par li-mèm. Armète la-dsi in sistème va pèrmète ali ansèrv plis possib la limyèr lo zour. Sa lé kalou, sa in bon n’afèr pou banna.

É nou, é nou, é nou ?

Nou lé pa an rotar la-dan. Issi nana lisé, nana kolèj, nana lékol primèr HQE*. Nana ossi bann l’antropriz, bann batiman konmsa. Lé inportan konète sa pars sa la pa in fantézi, sa in n’afèr byin néssésèr. Pou lo mèm rézon ké la-ba, mé pa solman ; pou nout lotonomi dann lénèrji, pou nout trap nout dévlopman dirab. Pou nout dévlopman tou-kour, pars lo tan la passé, é zordi ankor nou la pankor in réjyon dévlopé... mèm si nou na toute sak i fo pou ariv o-bi.

 Justin 

* HQE : Haute qualité environnementale.