Lo fon dé shoze sé pou mète bande israélien zarab épi bande palèstinien an gran difikilté par rapor bande juif…

Zot i koné lékilib rante lé troi pouvoir, egzékitif, lézislatif épi zidissyèr néna in bi sé d’ranfors la démokrassi. Si tèlman k’okin pouvoir i gingn fé disparète lé dê zot. Mé lo bi vizé i korèspon d’apré sak bande zoinalist la di, in sorte apartheid tèl fasson ké bande priviléjyé i rotrouv azot avèk in pouvoir ranforssé é bande z’israélien arab épi bande palèstinien i artrouv azot afébli dovan lo pouvoir.

La kriz-la i razoute avèk in n’ote kriz k’i apèl la korupssion. Si tèlman bande umorist israélien, dovan bande zinégalité néna dann la sossyété, i di dann Israêl, le tièr d’moune i travaye, lo tyèr i fé sèrvis militèr, lo tyèr i pèye zinpo mé lo problèm sé ké sé touzour lo mèm tyèr é bonpé d’moune i travaye pa, i fé pa sèrviss militèr, épi i pèye pa l’inpo. Arzoute avèk sa zot i partaz bande zidé l’ékstrème droite anti palèstinien épi anti arabe.

Zordi mi sorte antande lo gouvèrnman Netanyau la désside momantanéman, rotir son profé d’réform zidissyèr. L’èr-la lo bande partizan la kontre-réform la rokomanss manifèsté, bande zadvèrsèr la pa arète manifèst é lo bande soutien amérikin i koné pa tro kossa néna po fèr. Zot i baz si tèlman dossi léstrème droite épi l’éta pou provok l’Iran an distanss... Mé sé l’èr ké lé shoze i va pi, pars l’Iran avèk l’Arabie saoudite la anklansh in prossessus pou fé l’union avèk la Chine pou intèrssédé.

Sa i anpèsh pa bande palèstinien ète réprimé : dopi komansman l’ané katrovin-diss palèstinien lété assassiné é la roprèssion i kontinyé avèk bande kolon i atake bande vilaz palèstien épi bann palèstinien i riposte konm zot i gingn é l’armé dan toussa, el i fé konmsi de rien n’été.

In sityassion a suiv, sa lé sir ; a bon antandèr salu.

Justin