Mwin téi di dann lékonomi blé i pé anbosh tan d’pèrsone. Dann l’agrikiltir épi son transfomassion tan ankor. Transformassyon lagrikiltir, la pèsh, lindistri, tan d’ kréol pou gingn travaye. Réjyonaliz l’anploi é ni gingn ankor plass in tralé rényoné. Lotosifizanss, tan ! Lotonomi dann lénèrji tan ankor ! Transpor tan ! Médssin, infirmyèz massèr, tan ankor. Touzis si mwin téi oi pa lo gro ta shomèr fonde dovan mwin konm la nèz dann solèye. Mwin té anbalé !

Anbalé ziskatan k’in vyé militan té dovan mwin - zordi li la fine dépass la vi - la di : « Skiz amin, li la di, mwin lé dakor avèk sak wi di mé kossa i fé pou bande pov ? »... Mézami mwin la antande in gran silanss dan lo pti sal-la konmsi shoval téi sorte bate amwin atèr é d’apré mwin an parmi noute bande kamarade in pé lété konm mwin : grogui ! KO i apèl sa.

Pars mwin la konprande toutsuite la mizèr li téi koné pa sa dann liv, épi dann zoinal, épi dann diskour, li té i koné sa par lintèryèr é sak li téi oi par l’intèryèr lété pa joli-joli pou li. Mi panss li té rovoi lo film son vi : zanfan mizèr, jenn-jan mizèr, épi zadilt épi famiy mizèr, gramoune mizèr, épi san tardé vyé moune mizèr.

Mwin lé sir konm li lété militan, li té dakor avèk domin, apré d’min, apré apré d’min. Mé zordi, talèr, asoir, kossa i fé ? Kossa i fé kan ou lé démini, kan la fin d’moi i komans lo kinz, kan faktir d’lo, léstréssité, biyé krédi, toussa i antass dann boite soulyé. Kissa i sava pèye sa é pli grav é koman i ranpli lo bouzaron plizyèr zénérassion i antass son kaz kan néna prèss pi arien.

Gramoune mi koné ou lé pi la, é mi rapèl konm ou lété in militan dévoué, koman ou téi la pou ésplik la politik lo parti… mé zordi mi koné la késtyon ou téi poz toultan, san dir, ziss pou konprande dann kèl train ou lété é késtyon-la lé sinp :

Kossa i fé pou bande pov ?- A bon ékoutèr, salu !

Justin