Mé sak mi rapèl sé ké dodan an parmi bande pèrsonaz l’avé i pintr – inlartist pénèr si zot i vé – répiblikin – téi vé fé in gran tablo, lo séfdèv son vi, mé opliss bande révolissyon té i éspass, opliss bande réaksyonère téi ropran favèr si télman li té i pinde pa : la révolission 1830 i pass, sète 1848 i pass son tour, Napoléon 3 i pran pouvoir, la komine i ariv épi i fini par pèrde. Li pinde touzour pa.

Ziska ké lo liv la fini, é dsi pa d’porte simetyèr li l’avé touzour pa fé son séfdèv.

Pou kossa mi di sa ? Pars mwin néna inn-dé kamarade i di amwin konmsa dopi in bon koup de tan zot i atande néna in bon grafi définitiv pou zot ékri kissoi zot roman, kissoi zot fondkèr, kissoi ankor zot pyèss téate sansa zot nouvèl é zot i di souvan toute grafi i bote pa zot-toute lékritir pou zot lé pa bon.

Zot i yème pa lékritir oktob 1977, zot i yème pa lo KWZ, lo Tangol i plé pa zot é fransh vérité parl pa zot lékritir 2021 zot néna orèr létimolozik. Boudikonte la poin arien i trouv zot favèr...

Mwin néna souvan défoi anvi dire, kass pa la tète pou lékritir, si zot néna gayar zafèr pou ékrir ébin ékrire mé mwin la bien konpori zot sé dé pèrféksyonist san pour san-non imazinatif pars zot noré pu invante lazot-4é konm zot i trouv pa lékritir k’i bote azot, zot i ékri pa, é nou léktèr possib ni gingn pa lire sak lé fonssé dann zot koko.

Romark sé zot shoi, mé in lékritir i ranplass pa lo linspirassion épi ossi lo transpirassion pars sanm pou mwin inn san l’ote sé arien é sé konmsa ké ni fonksyone nou bande zékrivèr : dis pou san linspirassion é katrovin dis pour san la transpirassion.