Matante Zélida la ékrir Justin :
Mon shèr nové, mon spès salté,
A ! Moin lété kontan yèr-o-soir (lindi soir) kan moin la antann, dann in sobat-koz, méssyé Virapoullé apré suif la Rézyon… é suifé oui vouzote ! La, la di lo pli vré-la ! La di lo tram-train, sa sé « di blèf »… dizon i kalkil mantèr la-dan. Li la di épi li la domann i rozistr’ali, pars solon li, la Rézyon l’apré tronp bann Rényoné, vik’èl i koné par avans sé in n’afèr k’i vyinra pa bou d’fèr. La pa prévi la kantité larzan k’i fo pou fé lo z’afèr, ranbours bann l’antropriz i mète l’arzan dédan, épi sirtou an avoir in zéstyon byin ékilibré. Ala la vérité ! La pa ditou sak l’Alyans l’apré rakonté ! Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr, mi kroi pa ditou la Droite la mark lo poin dann lo sobatkoz lindi soir. Pa ditou ! Pars déssi la késtyonn tram-train, zistoman, Elie Hoarau la amontr koman prozé-la lé byin améné, épi koman va vni a bou ariv o-bi. Déssi le lindamnité la Rézyon la domann gouvèrnman, lo roprézantan l’Alyans la di, épi sa lé vré... si i vèrs so larzan-la an Frans, i fo vèrs ossi issi… sé in késtyonn l’égalité. Arzoute èk sa la kantité larzan sa i sava done bann l’antropriz — 600 milyon l’éro, sa i trouv pa sou la pate shoval ! Epi la kantité d’moun va gingn travay kan va rouv lo shantyé, épi kan tram-train va komans roulé. Plis ké zamé, prozé la Droite, sé lo koma sirkilatoir assiré ! Tan k’a lo tram-train, plis ké zamé, la mazorité d’moun lé pou sa... tram-train ? Yes, we tram !

Justin