Kèl koté dolo lé pli prop ? La sours bien sir plito ké la rivyèr. Pou kosa mi di sa ? Pars kan dolo i sort la sours li lé konm tamizé vik li la fine travèrs inn-dé koush. Dizon li é konm filtré é na poin arien la fine sali ali - konm i di poinn z’inpirté. Sé sak nout tout i romark par nou mèm san z’alé fé l’analiz dolo. Donk, sak lé di an-o la, lé bien vré d’apré sak nout tout i pans. Solman konm mi di souvan dé foi, kozman-la sa in provèrb sa, donk konm provèrb li pé s’anpass la sours konm la rivyèr. I di pa : lé proférab adrèss Bondyé ké son bann Sin ! Ni pé dir nout kozman i vé dir in pé lo mèm z’afèr mi sort mark an-o la . Alé ! Mi lèss azot rofléshi la dsi é ni artrouv pli d’van sipétadyé.