Mézami dé foi ou néna in bon l’opinyon dsi in moune, défoi sé lo kontrèr, la pèrsone i aparé pa ou konm inn pèrsone konfyanss. Wi oi èl konm kapab mète in kou d’zanbèk pou anpèsh aou avanssé. Ou néna rézon, ou néna tor toute fasson wi oi pa ou apré travaye avèk li. Ou na linpréssion lé zisss bon pou monte in bob konte ou.

Antouléka manyèr i di sa, i lèss pa in m’ti plass pou la konfyanss. Lontan noré di konfyanss lé mor dsou pyé tamarin… Pou kossa i di sa oziss ? Mi konpran pa tro sof paré-t-il bann bononm téi zoué karte, sansa lo dé dsou pyé d’boi é l’avé touzour inn pou sèye roul lé zot dan la farine si tèlman k’aprésa na pi d’konfyanss.

Alé ! Mi kite azot rofléshir la dsi é ni retrouv pli d’van, sipétadyé.

Justin