Si mi tronp pa, « la berlok » osinonsa « la brelok » sé in montr désèrtin moun té i mète dann in pti posh pantalon i apèl lo gousé. Sa lété anmaré avèk in shène épi té i tir pou rogard l’èr.

Donk lo patron téi tir son berlok pou vérifyé l’èr pou arète travay. Mèm kan té fine l’èr pou arété bann zournalyé (zournalyèz) té i fé bann korvé : rode la paye pou lapin, rode de boi pou kui manzé, aranz in n’afèr i marsh pa, giz son l’arloir épi tout sort ti boulo. Donk « travay la berlok » sé pran dsi son tann poz pou fé bann ti travay.

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké rant-rant ni pé z’ète dakor rantre nou.