Koméla, kan i di la « bourkant » lé posib demoun i konpran pa pars sak demoun i koné zordi sé lo « brokant » : i anparll sa dann radyo, dann shak kartyé nana inn é près tou lé dimansh nana kliyan i kour brokant an brokant pou alé ashté bon marshé in n’afèr zot la bézoin konm pa. Mé la bourkant la pa la mèm shoz, dizon sé in fo-z’ami pars travay la bourkant sé fé pti travay, pti biznès : i pé dir osi « travay la klé » . Sa la pa bien légal mé sa i ède désèrtin amélyor in pé lo rodinèr, i mète in pé la sos dann kari. Kosa zot i anpans zot ? Arien ditou ? Fé travay in pé z’ot koko ! Fé bouy in pé z’ot matyèr griz ! Zot va oir ké, rant-rant, ni pé z’ète, tazantan, dakor rantre nou.