La pa in promyé avril, mi pans ! La pa in bob, vi k’la pass dann télé, épi dann radio, épi ankor dann zournal ! É la pa ninport de ki la di in n’afèr konmsa, é anplis l’avé in bann témoin… plizyèr santène, d’apré sak moin la antann. Sa in drol z’afèr an vérité ! Figuir azot, méssyé Zan-Fransoi Kopé, lo shèf l’UMP, lo parti lo pti prézidan, la déside lans in drol kozman. Apré lo « travay plis pou gingn plis » Sarkozy la invanté é la fini an lo d’boudin pou bann travayèr, ala ké l’UMP i vé lans in nouvo tik-tak : « travay myé pou gingn plis ! ». Lé for in n’afèr konmsa !
Pou kosa i di sa ? Pars bann travayèr i travay mal ? La pa vré ditou. An kontrèr, dann la France, bann travayèr i travay bien épi i travay in bonpé. Toute bann shif i di sa ! Myé k’sa, bann travayèr i gingn moins-an-moins, par raport sak zot i produi, é bann z’aksyonèr é bann éspékilatèr i gingn plis-an-plis.
Pou nou, La Rényon, sa in kozman karéman insolan : issi na plis san sèz mil shomèr katégori A, plis san karann-troi mil si i azout bann katégori B ansanm. Karéman insolan ossi si i kalkil gouvèrnman la diviz par dé lo nonm kontra-édé, si i pans sé l’UMP la siprime bann gran shantyé té paré pou komansé é paré pou donn Kréol travay.
Alors, pardon-éskiz, mé travay myé pou gingn plis, sa ni vé pa. Konm nou té i vé pa lo « travay plis pou gingn plis ». Pars sé travay k’i mank anou ! Kréol i vé sinpleman gingn i travay !

Justin