Dann bann kozman fransé i di souvan dé foi : « Tout pène i mérite salèr ». Sé in n’afèr sinp, in prinsip konm i di kékfoi, mé a bien kalkilé demoun i réspèk pa sa pli souvan ké ni kroi. Dann tan lésklavaz zanimo té myé trété ké d’moun. Dann tan l’angajman, téi ariv demoun téi travaye pou la po patate. Moin la konète in vyé moun zordi la fine kapote l’ot koté la vi ébin gramoun la la konète travaye a la tash, mé anpliské sa shak travayèr té i doi lo propriyétèr in korvé. Kisoi in pogné manzé lapin, kisoi in pti paké d’boi, kisoi in séo d’lo pou alé rode dann fon in sours pou zanimo. Sa té i spass dann tan lontan isi La Rényon. Zot i konpran sa té travaye an plis, é ou té pa péyé pou sa… Alé ! Mi lèss azot rofléshi la dsi ni artrouv pli d’van sipétadyé.