Médame, zé méssyé, la sossyété issi La Rényon néna in bonpé d’moune i travaye : in pé lé a-titré, in bonpé galman i travaye o blak – donk san déklaré. Lontan l’avé in n’ote mo é l’ote mo-la té i di sa « La bourkante“sansa”la klé" ». Mézami mi panss daoir ankor d’ote mo pou di sa.

Pars kan néna in réalité i fo mète in mo dsi li é konm ni koné travaye la klé, travaye la bourkante, travaye o blak sa lé pa paré pou fini dann in péi konm la n’ote la rate son dévlopman ziska zordi. In mo konm mi sorte di li lé pou égzisté, toultan ké la réalité va égzisté. Si la réalité i disparète, lo mo va disparète sansa li va ansèrv pou di in n’ote réalité… Astère mi doi fé in romark : pou invante in mo, i fo ou néna l’imazinassion é ou lé pa prizonyé la lang ofissyèl-pars sinonsa sé la lang ofisyèl va dikt aou lo mo dann trou d’ zorèye.

Konbien mo lo pèp la fine invanté dann noute lang pars sak la kozé téi koné pa lo mo ofisyèl – sansa lo sanss lo mo ofisyèl-é mwin, pou mon par, mi oi sa konm in bénédiksyon pou nou épi pou noute lang kréol rényoné. Alor, mon bande dalon si zot néna la possibilité pou troke in mo, ézite pa ! ézite pa anrishi noute lang par la kréolizassion.

Alé ! Ni rotrouv pli d’van. Sipétadyé.