Mi pans zot i koné kosa i lé in békèr d’klé, sansa in moun i travaye la klé. Pou gingn in moné, lo békèr d’klé i travaye in pé, an prinsip moins k’in zourné. Kisoi pou désharj panyé ! Kisoi pou grate in kour ! Kisoi ankor pou ède fé in déménajman ! An touléka, sa la pa in vré travaye dan lé règl, déklaré é tout mé konm i di, sa in manyèr mète do bèr dann z’épinar, in manyèr aranj in pé lo kotidien… Zordi nana travaye o noir, mé la pa ditou konm travaye la klé. Lo travayèr o noir i kroi li fé in bon n’afèr, alé oir li la fé abiz dsi li, la plipar d’tan. Alé ! M lèss azot réfléshi la dsi é ni artrouv pli d’van sipétasdyé.